Запускаецца беларускае медыя пра гендар і сэксуальнасць
Чаму цяпер?
«ДазХіп» з'явіўся ў адказ на цішыню, якая, як нам здаецца, усё больш шчыльным воблакам ахутвае ЛГБТК+ людзей з Беларусі. Хтосьці скажа: цяпер ёсць праблемы больш важныя. Спрачацца не станем. Аднак нас турбуе сітуацыя, у якой ЛГБТК+ людзі зноў становяцца нябачныя ў гістарычным пейзажы, а іх унёсак у любыя змены размываецца, быццам яго і няма.
Мы не ігнаруем выклікі апошніх гадоў, а, наадварот, пільна ўглядаемся ў трывожную будучыню. Рэпрэсіі, міграцыя, вайна — усё гэта адбываецца ў тым ліку з ЛГБТК+ людзьмі. Іх досвед не менш важны, чым досвед гетэранарматыўных персон, а часцяком мае сваю (і зусім не станоўчую) спецыфіку. Таму мы хацелі б агучваць важныя гісторыі, каб яны былі кропкай апоры ў моманце, а глабальна, цалкам верагодна, запускалі той эфект матылька, што патрэбны для справядлівых зменаў.
Пра што гэта ўсё?
На «ДазХіп» будуць выходзіць важныя, карысныя і цікавыя матэрыялы пра людзей ЛГБТК+. У першую чаргу мы канцэнтруемся на падзеях, якія адбываюцца цяпер і могуць паўплываць на будучыню; героях, якія даюць падставы для глыбокіх разважанняў; з'явах, якія хочацца апісаць і як след зразумець, каб мацней зацэментаваць іх у падмурак агульнай рэальнасці.
У нас ёсць агульныя базавыя прынцыпы, аднак нават унутры каманды мы розныя і разумеем, што людзі, якія адносяць сябе да кам'юніці ЛГБТК+, жывуць вельмі розныя жыцці і маюць розныя каштоўнасці. Таму на «ДазХіп» будуць выходзіць як тыя матэрыялы, што аб'ядноўваюць нашы атамізаваныя энергіі ў нешта больш магутнае, так і тыя, што выклікаюць дыскусіі і дазваляюць выйсці з камфортнай бурбалкі ўласнай думкі.
Нам цікава ўсё, што хаваецца за спалучэннем літар «ЛГБТК+ Беларусі». Хоць, вядома, не ўсё з гэтага мы палічым патрэбным апублікаваць.
Што ў планах?
Мы цікаўныя, уважлівыя і досыць эмпатычныя для таго, каб змяняцца з аглядкай на патрэбы нашай аўдыторыі. Мы не ігнаруем вопыт медыя, якія былі да нас, але разам з тым мы захопленыя магчымасцямі новых фарматаў і хацелі б спрабаваць рознае.
Мы адкрытыя да любога кшталту супрацоўніцтва і ўзаемадзеяння. Калі ты маеш патрэбу ў нашай пляцоўцы як аўтар_ка, актывіст_ка, фатограф_ка, ілюстратар_ка або ў нейкай іншай ролі — не трэба саромецца.
Як з намі звязацца?
Пошта: [email protected]